ECOS é un proxecto de deseño que investiga a relación entre a madeira, o territorio e a tecnoloxía, transformando as características sonoras dos bosques en elementos visibles e táctiles integrados no mobiliario. A súa finalidade é reforzar o vínculo entre o obxecto e o seu lugar de orixe, incorporando na superficie da madeira unha textura xerada a partir da análise acústica dos cantos das aves que habitan o ecosistema do que procede a materia prima.

O proceso comeza coa selección de madeira local certificada, cuxa trazabilidade permite coñecer con precisión a procedencia e o momento da súa talla. Esta trazabilidade constitúe tanto un requisito técnico como un principio ético, xa que busca garantir unha produción responsable e respectuosa co medio. Coñecer a parcela de orixe permite estudar as características do bosque e rexistrar a avifauna asociada a ese entorno.

Cada tipo de bosque presenta unha paisaxe sonora única, determinada polas especies que o habitan. Nas aves residentes obsérvanse incluso dialectos locais, resultado da aprendizaxe social e da adaptación acústica ás condicións específicas de cada territorio. A partir das gravacións obtidas realízanse análises acústicas e espectrais que, mediante un algoritmo desenvolvido especificamente para o proxecto, se transforman en datos xeométricos. Estes datos dan lugar a volumes tridimensionais que posteriormente son convertidos en códigos de mecanizado para gravar as texturas sobre a madeira mediante tecnoloxía CNC.

O primeiro obxecto desenvolvido dentro desta investigación é un banco de liñas sinxelas e atemporais, deseñado para destacar a materia e a textura sen elementos superfluos. A gravación aparece nun dos extremos e desvanece progresivamente cara ao outro, xerando un equilibrio entre expresión estética e funcionalidade.

Cada peza incorpora ademais un chip NFC que permite acceder á información sobre a procedencia da madeira, o bosque de orixe, as especies rexistradas e os sons utilizados no deseño. Deste modo, ECOS converte cada moble nun obxecto único que preserva e comunica a identidade sonora do territorio do que nace.

Materiais: Carballo

Técnicas: ensambles e CNC

‍

‍